Qauntum Magnetic Analyzer for sale

 Quantum Magnetic Analyzer for sale

تعجب ہے کہ جو سردار بھی ہے

 تعجب ہے کہ جو سردار بھی ہے

تعجب ہے کہ جو سردار بھی ہے

 قبیلے کا وہی غدار بھی ہے

عداوت سے بہت بےزار بھی ہے

 مگر وہ برسرِ پیکار بھی ہے

محبت وادی ء پرخار بھی ہے

کرم ہوجائے تو گل زار بھی ہے

اسی سے زندگی میں رنگ سارے

تعلق باعث آزار بھی ہے

لبوں پر "ہاں"  نگاہوں میں "نہیں" ہے

"بہم انکار بھی اقرار بھی ہے"

کنارے میری قسمت میں کہاں ہیں

کوئی دریا ہی دریا پار بھی ہے

تیرے لہجے میں جھرنوں کا ترنم

مگر تلوار سی اک دھار بھی ہے

 کس و ناکس کی جو کرتا ہو عزت

وہی تعظیم کا حق دار بھی ہے

وہی ہے دل کی راحت کا سبب بھی

مگر وہ باعثِ آزار بھی ہے

میرا وجدان آسی کہ رہا ہے

کوئی روزن پسِ دیوار بھی ہے

محمد نور آسی

27 جولائی 2020

چشمِ نم کوکبھی دریا نہیں ہونے دیں گے

 چشمِ نم کوکبھی دریا نہیں ہونے دیں گے

چشمِ نم کوکبھی دریا نہیں ہونے دیں گے

تیری تصویر کو گیلا نہیں ہونے دیں گے

ٹوٹ جائیں کہ بکھرجائیں وفا کی راہ میں

"زندگی ہم تجھے رسوا نہیں ہونے دیں گے"

اپنی تعظیم کو رکھیں گے ہم حد کے اندر

پُوج کر اس کوخدا نہیں ہونے دیں گے

اڑ گئے سارے پرندے بھی تو ہم بیٹھیں گے

ہم درختوں کواکیلا نہیں ہونے دیں گے

ربط رکھنا ہے تو انداز بھی بدلو اپنے

یہ رویے تو کسی کا نہیں ہونے دیں گے

رات کٹ جائے گی ، سورج بھی نکل آئے کا

پر تیرے وہم سویرا نہیں ہونے دیں گے

وہ دعاؤں کے جن سایوں کو اوڑھے ہوئے ہے

میری بیٹی کو زلیخا نہیں ہونے دیں گے

محمد نور آسی

19-09-2019

جھیل کا مدعا سمجھتے ہیں

جھیل کا مدعا سمجھتے ہیں

غزل 

دل کا ہر رابطہ سمجھتے ہیں

ہم تیرا دیکھنا سمجھتے ہیں

اس لئے ہم برے ہیں بتلاؤ

ہم برے کو برا سمجھتے ہیں

ہم پرندوں کو ساتھ لے آئے

جھیل کا مدعا سمجھتے ہیں

وہ عمودی ہو یا کہ افقی ہو

ترا ہر زاویہ سمجھتے ہیں

عشق تھا، صبر تھا کہ قربانی

ہم کہاں کربلا سمجھتے ہیں

وصل کیا ہے ؟ تمھیں نہیں معلوم؟

چل، کسی روز آ، سمجھتے ہیں

یہ محبت ردیف ہے صاحب

آپ کیوں قافیہ سمجھتے ہیں

قربتیں تو اسی کا پرتو ہیں

ہم جسے فاصلہ سمجھتے ہیں

اب بھی یوسف کے کچھ برادر ہیں

"دوستی کو برا سمجھتے ہیں"

ہم فقط شعر ہی تو کہتے ہیں

لوگ ہیں کیا سے کیا سمجھتے ہیں

لوگ منزل سمجھ کے بیٹھے ہیں

ہم جسے راستہ سمجھتے ہیں

تیرے قدموں کی لڑکھڑاہٹ کو

ہم ترے زیر پا سمجھتے ہیں

گرچہ ہم جانتے ہیں عاصی ہیں

لوگ ہیں! پارسا سمجھتے ہیں

محمد نورآسی

14-09-2019