چشمِ نم کوکبھی دریا نہیں ہونے دیں گے

 چشمِ نم کوکبھی دریا نہیں ہونے دیں گے

چشمِ نم کوکبھی دریا نہیں ہونے دیں گے

تیری تصویر کو گیلا نہیں ہونے دیں گے

ٹوٹ جائیں کہ بکھرجائیں وفا کی راہ میں

"زندگی ہم تجھے رسوا نہیں ہونے دیں گے"

اپنی تعظیم کو رکھیں گے ہم حد کے اندر

پُوج کر اس کوخدا نہیں ہونے دیں گے

اڑ گئے سارے پرندے بھی تو ہم بیٹھیں گے

ہم درختوں کواکیلا نہیں ہونے دیں گے

ربط رکھنا ہے تو انداز بھی بدلو اپنے

یہ رویے تو کسی کا نہیں ہونے دیں گے

رات کٹ جائے گی ، سورج بھی نکل آئے کا

پر تیرے وہم سویرا نہیں ہونے دیں گے

وہ دعاؤں کے جن سایوں کو اوڑھے ہوئے ہے

میری بیٹی کو زلیخا نہیں ہونے دیں گے

محمد نور آسی

19-09-2019

جھیل کا مدعا سمجھتے ہیں

جھیل کا مدعا سمجھتے ہیں

غزل 

دل کا ہر رابطہ سمجھتے ہیں

ہم تیرا دیکھنا سمجھتے ہیں

اس لئے ہم برے ہیں بتلاؤ

ہم برے کو برا سمجھتے ہیں

ہم پرندوں کو ساتھ لے آئے

جھیل کا مدعا سمجھتے ہیں

وہ عمودی ہو یا کہ افقی ہو

ترا ہر زاویہ سمجھتے ہیں

عشق تھا، صبر تھا کہ قربانی

ہم کہاں کربلا سمجھتے ہیں

وصل کیا ہے ؟ تمھیں نہیں معلوم؟

چل، کسی روز آ، سمجھتے ہیں

یہ محبت ردیف ہے صاحب

آپ کیوں قافیہ سمجھتے ہیں

قربتیں تو اسی کا پرتو ہیں

ہم جسے فاصلہ سمجھتے ہیں

اب بھی یوسف کے کچھ برادر ہیں

"دوستی کو برا سمجھتے ہیں"

ہم فقط شعر ہی تو کہتے ہیں

لوگ ہیں کیا سے کیا سمجھتے ہیں

لوگ منزل سمجھ کے بیٹھے ہیں

ہم جسے راستہ سمجھتے ہیں

تیرے قدموں کی لڑکھڑاہٹ کو

ہم ترے زیر پا سمجھتے ہیں

گرچہ ہم جانتے ہیں عاصی ہیں

لوگ ہیں! پارسا سمجھتے ہیں

محمد نورآسی

14-09-2019 

لفظ ہجرت پر کہے گئے اشعار

لفظ ہجرت پر کہے گئے اشعار

یہ اشعار انحراف انٹرنیشنل فورم میں لکھے گئے تھے

یہ خانہ بدوشی سے الگ اور ہی دکھ ہے
ہجرت کو فقط نقل مکانی نہیں سمجھو
٭٭٭٭٭
اپنے گھر سے نکلنا پڑتا ہے
ہجرتیں بیٹھ کر نہیں ہوتیں
٭٭٭٭٭
ان کو رکنے کا حکم ہو سائیں
پاؤں ہجرت پہن کے بیٹھے ہیں
٭٭٭٭٭
اونٹوں کی اک قطار تھی ، صحرا کی دھوپ تھی
ہجرت کی دوپہر کسی سوہنی کا روپ تھی
٭٭٭٭٭
گلیاں، گھر ، چوبارے، سارے خواب بھی چھوڑنے پڑتے ہیں
ہجرت کرنے والے دل میں لاکھوں قبریں ہوتی ہیں
٭٭٭٭٭
حسرت سے آنکھ دیکتھی تھی جب پڑاؤ کو
ہجرت نے مسکرا کے اشارہ کیا مجھے
٭٭٭٭٭
ہجرت کی ابتدا تو خدا جانے کب ہوئی
یثرب سے جب حسین چلے، انتہا ہوئی
٭٭٭٭٭
کون تھا جو ہجرت کا سوچتا مدینے سے
بات تھی شریعت کی حوصلہ حسینی تھا
٭٭٭٭٭
میری طرح سے یہ ہجرت پسند ہوتے ہیں
اسی لئے تو پرندوں سے پیار ہے مجھ کو
٭٭٭٭٭
ہجرت کے دکھ سہنے والے اس کی عظمت جانتے ہیں
ہجرت ایک ریاضت بھی ہے ہجر ت ایک سعادت بھی
٭٭٭٭٭
مجھے حیرت سے کیوں تم دیکھتے ہو
یہ موسم ہیں جو ہجرت کررہے ہیں
محمد نور آسی
2019

دہرے قوافی کے ساتھ ایک غزل

دہرے قوافی کے ساتھ  ایک غزل

محمدنور آسی 

مروت سے جو ملتا ہے سمجھ لیتے ہیں ہم اپنا

تبھی تو سانپ مل جاتے ہیں اکثر آستیں نیچے

 کہیں قدموں میں ہم بھی اس کو  شاید پھر نظر آتے

اگر تو دیکھ لیتا وہ ستم گر دل نشیں نیچے

روانی ہے کسی جھرنے کی جیسے۔ اک پہاڑی سے 

لچکتی آ رہی ہے وہ اتر کر ماہ جبیں نیچے

بڑے آئے گئے دنیا میں  تم جیسے کئی آسی

ہیں بے نام و نشاں دارا اور اسکندر، زمیں نیچے

ہمیشہ خواب دیکھ اونچے فلک کو چھو ستارے چن

نظر رکھ آسمانوں پر مگر رکھ کر زمیں نیچے

زمیں ہے آسماں میرا ، یہیں ہے آستاں میرا

کہ میرا آسماں نیچے، مرے اختر یہیں نیچے

کہاں آسی اس قابل فقط تیری نوازش ہے

مجھے بھی آسماں بخشا ہے مٹھی بھر یہیں نیچے

2019