حرفِ اول کا بوجھ

 حرفِ اول کا بوجھ

لکھنے سے پہلے ایک ایسی کیفیت طاری ہوتی ہے جس کا کوئی واضح نام نہیں۔

یہ نہ محض خاموشی ہے، نہ مکمل اضطراب ۔۔۔۔ بلکہ دونوں کے درمیان پھیلا ہوا ایک بوجھل توقف۔ جیسے ذہن کسی غیر مرئی دہلیز پر کھڑا ہو اور اندر جانے یا پلٹ آنے، دونوں سے یکساں خائف ہو۔

اس لمحے احساسات صاف نہیں ہوتے، وہ مبہم، نیم روشن سایوں کی طرح موجود رہتے ہیں۔ کچھ یادیں دل کے کونے میں جمے بیٹھے رہتی ہیں، جنہیں چھیڑنے سے خوف آتا ہے کہ کہیں سب کچھ بکھر نہ جائے۔ کچھ خیالات اپنی بے ترتیبی میں ہی سچ لگتے ہیں، مگر لفظوں کی ترتیب مانگتے ہیں۔ اور یہی مطالبہ سب سے زیادہ کٹھن ہوتا ہے۔

لکھنے سے پہلے انسان خود سے غیر معمولی ایمانداری کا مطالبہ کرتا ہے۔ سوال یہ نہیں ہوتا کہ کیا لکھنا ہے ۔۔۔۔ بلکہ یہ کہ کیا چھپانا ہے۔ کیونکہ ہر تحریر، شعوری یا لاشعوری طور پر، ایک انتخاب ہوتی ہے ۔کون سا سچ بولنا ہے، اور کون سا سچ خاموشی میں دفن رہنے دینا ہے۔

یہ کیفیت دراصل خود احتسابی کا لمحہ ہے، جہاں قلم اٹھانے سے پہلے دل لرزتا ہے۔ اس لرزش میں خوف بھی شامل ہے اور امید بھی ۔۔۔۔ کہ شاید لکھنے کے بعد ذہن کچھ ہلکا ہو جائے، یا شاید اور بھاری۔

شاید اسی لیے لکھنے سے پہلے کا لمحہ، خود تحریر سے زیادہ فکر انگیز ہوتا ہے۔

یہ وہ مقام ہے جہاں انسان لفظوں کو نہیں، خود کو ترتیب دینے کی کوشش کرتا ہے۔

اور اکثر اسی کوشش میں، سب سے گہرا سوال جنم لیتا ہے۔

کیا ہم سچ لکھیں گے، یا محفوظ الفاظ کی پناہ لیں گے؟

کیونکہ لکھنا شروع ہوتے ہی، خاموشی ٹوٹ جاتی ہے، اور پھر واپسی ممکن نہیں رہتی۔

#نوریات

مزید پڑھیں

شجر کو کاٹ کے پتھر اگائے جاتے ہیں

پھر کرم ایسے ہوا ان پہ پیحمبر اترا

ابھی سفر کے بتاؤ نہ استخارے مجھے