لفظ بولتے ہیں

  پنجاب کے دیہی و شہری معاشرت میں ہونے والے تغیرات کی کہانی محض چند برسوں کا قصہ نہیں بلکہ ایک پوری تہذیب کے ڈھلنے اور دوسری کے ابھرنے کی داستان ہے۔ ایک وہ دور تھا جب اس خطے کی پہچان مادیت پرستی نہیں بلکہ وہ خالص پن تھا جو یہاں کے رسم و رواج، خوراک اور باہمی تعلقات سے چھلکتا تھا۔ اس زمانے میں بناسپتی گھی یا ڈالڈا کا گھر میں آنا ایک معیوب بات سمجھی جاتی تھی۔ شادی بیاہ کے مواقع پر اگر کسی میزبان نے غلطی سے بھی ڈالڈا گھی کے پکوان پیش کر دیے تو یہ بات پورے علاقے میں تذکرے کا باعث بنتی اور بعض من چلے تو اسے اپنی توہین سمجھتے ہوئے کھانے کا بائیکاٹ کر کے اٹھ جاتے۔ دیسی گھی اس وقت محض چکنائی کا ذریعہ نہیں بلکہ خاندان کی عزت، تمکنت اور اعلیٰ سماجی مرتبے کی علامت تھا۔ وقت کے ساتھ ساتھ اس خالص پن پر جدیدیت کے سائے لہرانے لگے۔ پہلے پنجاب کا سب سے بہترین اور مقبول ترین مشروب گنے کا تازہ رس ہوتا تھا۔ دیہاتوں میں جب گنے کی کٹائی کا سیزن شروع ہوتا تو کھیتوں کے قریب نصب ویلنے (گنا پیلنے والی مشین) ایک سماجی مرکز کی حیثیت اختیار کر لیتے تھے۔ بیلوں کی جوڑی جب ایک مخصوص تال کے ساتھ دائروں میں گھومتی ا...